Sogn KO lyser ut anbod for næringsutviklingstenester
Sogn kommunalt oppgåvefellesskap (Sogn KO) lyser ut konkurranse om levering av næringsutviklingstenester for kommunane i Sogn. Målet er å sikre eit koordinert, profesjonelt og framtidsretta tilbod til næringsliv, gründerar og lokalsamfunn i regionen frå 2027. Anskaffinga vert gjennomført som ei open anbodskonkurranse i tråd med regelverket for offentlege anskaffingar.
Gunn Lerøy, styreleiar i Sogn KO
Bakgrunnen for anskaffinga er arbeidet med å styrkje arbeidet med næringsutvikling i Sogn. Gjennom kartleggingar og utgreiingar er det peika på at regionen har mange aktørar, men at ressursane i dag er fordelte på fleire miljø med ulike roller og organisering. Ei felles anskaffing skal bidra til betre samordning, tydelegare arbeidsdeling og meir effektiv bruk av ressursane på tvers av kommunegrensene.
Anskaffinga omfattar tenester som skal bidra til næringsutvikling, verdiskaping og auka attraktivitet i regionen. Oppdraget gjeld rådgjeving, prosjektutvikling, nettverksbygging, arbeid med kompetanse og rekruttering, samt støtte til gründerar og næringsliv. Tenestene skal utførast i tråd med kommunane sine mål og prioriteringar.
-Kommunane våre har mykje til felles, og gjennom å samarbeida tettare kan me få meir kraft, større fagmiljø og betre utnytting av ressursane våre, seier styreleiar Gunn Lerøy i Sogn KO, og held fram:
-Målet er at både etablerte verksemder og dei som ønskjer å starta noko nytt, skal møta eit profesjonelt næringsapparat med lokalkunnskap og nærleik til næringslivet. Samstundes skal me bli betre til å løfta fram prosjekt og satsingar som går på tvers av kommunegrensene. Gjennom ei open og transparent anskaffing får vi konkurranse om oppdraget og sikrar at kommunane kjøper tenester på ein måte som er i samsvar med lovverket. Samstundes skal løysinga gje rom for lokale behov og prioriteringar, seier styreleiaren.
Anskaffinga er utforma for å sikre open konkurranse, likebehandling av tilbydarar og etterprøvbare prosessar. Konkurransen er lyst ut på vegner av kommunane Aurland, Luster, Lærdal, Sogndal og Vik, medan Årdal har opsjon på å slutte seg til avtalen. Kvar kommune vil sjølv ta stilling til deltaking, omfang og økonomiske rammer gjennom eigne politiske vedtak. Endeleg avtale vil difor vere avhengig av politisk forankring og budsjettvedtak i dei einskilde kommunane.
Dersom prosessen går etter planen, vil ny avtale tre i kraft frå 1. januar 2027. Målet er at næringslivet i heile Sogn skal møte eit meir samordna og føreseieleg tenestetilbod som styrkjer regionen si utviklingskraft og konkurranseevne.
Fakta
Oppdragsgjevar: Sogn kommunalt oppgåvefellesskap (Sogn KO) og kommunane Aurland, Luster, Lærdal, Sogndal og Vik. Årdal er med som opsjon.
Konkurranseform: Open anbodskonkurranse etter regelverket for offentlege anskaffingar
Føremål: Kjøp av næringsutviklingstenester for kommunane i Sogn
Planlagd oppstart: 1. januar 2027
