Sogn veks fram mot 2050
Dei seks kommunane i Sognaregionen vil samla sett ha fleire innbyggjarar i 2050 enn i dag. Det viser SSB sine nyaste befolkningsframskrivingar. Aurland, Lærdal, Luster, Sogndal, Vik og Årdal går frå 29 829 innbyggjarar i 2026 til 31 009 i 2050 – ein vekst på 1 180 personar, eller nesten 4 prosent.
Det er ikkje sjølvsagt. Store delar av det tidlegare Sogn og Fjordane går motsett veg, med stagnasjon og nedgang i folketalet dei neste 25 åra. Firda har laga eiga sak på dette: Slik ser framtida ut der du bur
Sogndal og Aurland er drivkreftene
Sogndal veks mest i absolutte tal, frå 12 552 til 14 269 innbyggjarar. Det er ein vekst på 1 717 personar, 13,7 prosent. Aurland har den høgste prosentvise veksten av alle dei 18 tidlegare Sogn og Fjordane-kommunane: frå 1 866 til 2 420 innbyggjarar, ein vekst på 554 personar, 29,7 prosent. Lærdal veks også, meir moderat: frå 2 223 til 2 323, opp 100 personar, 4,5 prosent. Samla står Sogndal, Aurland og Lærdal for ein vekst på 2 371 personar. Luster ligg på det jamne framover, etter å ha hatt vekst i folketalet dei siste åra.
Utfordringane ligg i Årdal og Vik
Årdal og Vik har den klaraste utfordringa i folketalsutviklinga fram mot 2050, med ein venta nedgang i innbyggjartalet. Årdal møter dette aktivt: kommunen har nettopp fått omstillingsstatus, med tilhøyrande midlar til å fornye og styrke næringslivet. Det gir eit konkret verktøy for å vende utviklinga.
Bildet for Sognaregionen er dermed todelt: sterk vekst i Sogndal, Aurland og Lærdal, eit stabilt Luster, og eit reelt arbeid å gjere i Årdal og Vik. Samla peikar likevel pilen oppover for regionen som heilhet.
Slik ser framtida ut der du bur. Om vi skal tru på det, då.
