Sogn KO støttar framlegg til nye reglar for interkommunalt samarbeid

Gunn Lerøy, styreleiar i Sogn KO og kommunedirektør i Lærdal

Sogn KO sender inn høyringssvar til Kommunal- og distriktsdepartementet om foreslåtte endringar i regelverket for interkommunalt samarbeid. Vi peikar på at samarbeid over kommunegrensene er avgjerande for å sikre nødvendig kompetanse, kapasitet og robuste fagmiljø i regionen.

I høyringssvaret uttrykkjer Sogn KO støtte til hovudgrepa i forslaget. Endringane byggjer vidare på etablerte samarbeidsformer og legg til rette for større lokalt handlingsrom for kommunane. Dette blir vurdert som viktig for å møte stadig meir komplekse oppgåver og behov for samordna tenester.

Særleg positiv er Sogn KO til forslaget om at kommunale oppgåvefellesskap som er eigne rettssubjekt, skal kunne fatte enkeltvedtak og utøve offentleg myndigheit. Etter Sogn KO sitt syn kan dette gjere det enklare å samle oppgåver i større fagmiljø, styrkje tenestene og leggje til rette for meir heilskaplege og langsiktige samarbeid mellom kommunane.

Sogn KO har ingen merknader til framlegga om administrativt vertskommunesamarbeid mellom kommunar og fylkeskommunar eller avviklinga av vertskommunesamarbeid med felles folkevald nemnd.

Når det gjeld interkommunale politiske råd, meiner Sogn KO at regelverket bør vere så enkelt og fleksibelt som mogleg. Vi peikar på at desse råda har eit anna formål enn kommunale oppgåvefellesskap, og at kommunane bør få rom til å organisere det politiske samarbeidet ut frå lokale behov og prioriteringar.

Oppsummert understrekar Sogn KO at forslaget om å gi kommunale oppgåvefellesskap høve til å utøve offentleg myndigheit, kan bli eit viktig bidrag til å styrkje det interkommunale samarbeidet. Samstundes blir det peika på behovet for eit enklare og meir tilpassa regelverk for interkommunale politiske råd, slik at dei kan fylle rolla si på ein effektiv måte.