Sognarådet i dialog om nye regionale planar
Måndag 14/9 møter Sognarådet den politiske og administrative leiinga i Vestland fylkeskommune for å drøfte to nye regionale planar. Planane skal leggje føringar for arbeidet med verdiskaping, kompetanse, areal og mobilitet i Vestland.
Møtet blir halde digitalt måndag 14. september klokka 10.00. Føremålet er presentasjon av planforslaga og innspel frå kommunane i Sogn medan planane er på høyring.
Dei to planane som skal drøftast, er regional plan for verdiskaping og kompetanse og regional plan for areal og mobilitet. Planane var også hovudtema på Sognatinget i april. Fylkesutvalet vedtok 24. august å leggje planutkasta og tilhøyrande handlingsprogram ut på høyring og offentleg ettersyn.
Politisk og administrativ leiing deltek
Frå Vestland fylkeskommune deltek fylkesordførar Jon Askeland, fylkesdirektør Robert Rastad, seksjonsleiar for plan, klima og analyse May-Britt Nesje Hernes og prosjektleiarane Kata Urban og Marianne Bugge.
Fylkesordføraren opnar møtet, før fylkesdirektøren held ei innleiing. Deretter blir planforslaga presenterte. Resten av møtet blir brukt til spørsmål og dialog mellom fylkeskommunen og representantane frå Sognarådet.
Innspel frå Sogn
I dialogen ønskjer fylkeskommunen mellom anna synspunkt på om planane peikar i rett retning, om dei føreslåtte grepa er dei rette, og kva kommunane forventar av fylkeskommunen som rettleiar og støttespelar.
-Vi har handsama prosessen rundt desse planane før, og vil legge rammene for våre høyringssvar i møte 21. oktober, fortel politisk koordinator, Yngve Hallén. -Denne presentasjonen med påfølgande spørsmålsrunde vert viktig før handsaminga i rådet og evt vidare i kommunane.
Høyringsfristen er 1. november
Les planforslaga