Sogn KO har sendt tre søknader om skjønnsmidlar til Statsforvaltaren i Vestland for 2027. Satsinga «Frå teknologi til betre tenester» handlar om velferdsteknologi og er prioritert øvst. Dei to andre søknadene gjeld administrative støttetenester og ein ny mottaksmodell i barnevernet.
Teknologien finst, men kommunane treng kompetanse, trygge arbeidsmåtar og god organisering for å ta han i bruk i tenestene. Prosjektet «Frå teknologi til betre tenester» skal samle kommunar, fag- og utdanningsmiljø og andre samarbeidspartar om læring og praktisk utprøving av velferdsteknologiløysingar.
– Teknologi er ikkje eit mål i seg sjølv. Vi må ta utgangspunkt i behova til innbyggjarane og dei tilsette for å skape tryggare og meir tilgjengelege tenester, seier styreleiar i Sogn KO, Gunn Lerøy.
Sogn KO har søkt Statsforvaltaren i Vestland om 1,3 millionar kroner i skjønnsmidlar til prosjektet. Totalramma er 2,6 millionar, med resten planlagt dekt av eigne midlar og arbeidsinnsats frå kommunane og Sogn KO.
Aurland, Luster, Lærdal, Sogndal, Vik og Årdal har gjennom Sogn KO prioritert prosjektet øvst av tre søknader. Oppstart krev tilskot, nødvendig forankring og endeleg finansiering.
Prosjektet skal etablere ein mobil eller permanent test- og læringsarena, tilby kurs og prøve ut løysingar i tenestene. Kommunane skal utvikle ein felles modell for behovskartlegging, innføring og vurdering av gevinstar, og dele erfaringane.
Målet er auka kunnskap og tillit til teknologien, sterkare fagmiljø og mindre dobbeltarbeid. Utprøvingane skal vise om løysingane betrar kvaliteten, aukar meistringa eller frigjer ressursar.
Fag- og utdanningsmiljø kan bidra med evaluering og undervisnings- og praksisopplegg, slik at elevar og studentar får erfaring med teknologien.
– Vi kan oppnå meir ved å lære og prøve ut løysingar saman enn kvar for oss, seier Gunn Lerøy.
Tre prioriterte søknader frå Sogn
Prosjektet om e-helse og velferdsteknologi er eitt av tre utviklingsprosjekt som regionen har prioritert i søknadsrunden for 2027. Felles for søknadene er at dei skal gi betre tenester, sterkare fagmiljø og mindre sårbarheit gjennom samarbeid mellom kommunane.
Sterkare i lag – administrative støttetenester
Kommunane utfører mange av dei same administrative oppgåvene, samstundes som fleire fagmiljø er små og sårbare. Prosjektet skal prøve ut digitalisering og interkommunal organisering på prioriterte område. Målet er betre kvalitet, sterkare fagmiljø, lågare sårbarheit og meir effektiv bruk av kompetanse, teknologi og ressursar. Det er søkt om 1,35 millionar kroner, med ei samla ramme på 2,7 millionar kroner.
Første møte – ny mottaksmodell i barnevernet
Den nye Sogn barnevernsteneste får eit eige team for mottak, barnevernsvakt og tenesteutvikling. Prosjektet skal utvikle og prøve ut ein kunnskapsbasert modell for det første møtet med meldingar, barn og familiar. Målet er meir systematiske vurderingar, betre fagleg støtte, auka tilgjenge og ein meir einsarta praksis i dei seks kommunane. Det er søkt om 1,2 millionar kroner til eit eittårig prosjekt med ei samla ramme på 2,4 millionar kroner.
Statsforvaltaren skal no vurdere søknadene før det blir klart kva prosjekt som får støtte. Dersom prosjekta får finansiering og nødvendig lokal forankring, skal endelege prosjektplanar godkjennast før oppstart.
