Beredskapsfellesskap i Sogn
Samandrag
Kommunane Aurland, Luster, Lærdal, Sogndal, Vik og Årdal samarbeider om å styrke samfunnssikkerheita og beredskapen i regionen. Målet er å etablere eit beredskapsfellesskap som gjer kommunane betre rusta til å førebygge, handtere og lære av uønska hendingar og kriser.
Status
Sogn KO har starta eit utviklingsprosjekt for å styrke den regionale og lokale beredskapsevna i Sogn. Prosjektet omfattar mellom anna arbeid med samhandling mellom kommunane, beredskapsaktørar og statlege instansar, utvikling av felles beredskapsløysingar og deling av kompetanse og erfaringar.
Bakgrunnen er eit meir samansett risikobilete med mellom anna klimaendringar, ras, flaum, utfordringar knytte til framkomelegheit og forsyningssikkerheit, samt behov for auka motstandskraft mot nye tryggingsutfordringar. I Sogn kan lange avstandar, vêrutsette vegar og sårbar infrastruktur gjere det krevjande å handtere kriser åleine. Gjennom samarbeid kan kommunane byggje sterkare fagmiljø, betre samhandling og meir robuste beredskapsløysingar.
Prosjektet skal òg utforske felles løysingar innan område som informasjonsdeling, transport og forsyningssikkerheit, kompetanseheving, forskings- og utviklingssamarbeid og samarbeid med frivillige organisasjonar, næringsliv og statlege aktørar.
Mål og hovudaktivitetar
Prosjektet skal styrke den kommunale og regionale beredskapsevnen i Sogn gjennom:
Etablering av eit beredskapsfellesskap mellom kommunane for samfunnssikkerheit- og beredskapsarbeid med mål om å styrke regionen og bidra til motstandsdyktige lokalsamfunn
Betre samhandling mellom kommunane, beredskapsaktørar, statlege instansar og med andre partar som inngår i å trygge befolkningas sikkerheit
Auka evne til å handtere samansette truslar, uønska hendingar og kriser i regionen
Forsterka lokal støtte til nasjonal og militær beredskap som gjer at Sogn står sterkare i lag i det førebyggande arbeidet og ved uønska hendingar høgare i krisespekteret
Fakta om prosjektet
Prosjekteigar:
Sogn KO
Prosjektleiar:
Halvard Gjerde
Prosjektmedarbeidarar:
Reinhardt Sørensen, Aurland
Åge Bøyum, Lærdal
Ole Gunnar Krakhellen, Luster
Halvard Gjerde, Sogndal
Ole Petter Ramberg, Vik
Gaute Johnsgård, Årdal
Finansiering:
Skjønsmidlar frå Statsforvaltaren og kommunale midlar
